حقیقی شاعر کسی مسلک یا مذہب کی توہینِ نہیں کرسکتا

سرینگر/15 جنوری: حال ہی میں سوشل میڈیا پر غیر مہذب الفاظ سے بھرپور ایک ویڈیو وائرل ہوا جس سے ایک خاص مسلک کے جذبات مجروح ہوئے اور اس کی جتنی بھی مذمت کی جائے کم ہے اس سلسلے میں وادی کی معروف ادبی انجمن اندر کلچرل فورم کی ایک ہنگامی میٹنگ جس کی صدارت فورم کے صدر سلیم یوسف نے کی منعقد ہوئی جس میں حالیہ ناشائستہ وائرل ویڈیو کی سخت الفاظ میں مذمت کی گئی۔

میٹنگ میں اس بات کو بھی دہرایا گیا کہ حقیقی شاعر کبھی بھی کسی بھی مسلک یا مذمت کی توہینِ نہیں کرسکتا۔ میٹنگ میں مزید کہا گیا کہ ادبی دنیا میں کئی ایسے نام نہاد شاعر شاعری کا لبادہ اوڑھ کر آپسی مسلکی منافرت پھیلانے کی اپنی ناپاک کوششیں کر رہے ہیں اور کوششوں کو کسی بھی صورت میں کامیاب نہیں ہونے دیا جائے گا۔

میٹنگ میں دوسری ادبی انجنوں سے تلقین کی گئی کہ کسی بھی ادبی تقریب میں ان شعراء کو مدعو کیا جانا چاہیے جن شعراء کو سب سے پہلے قرآن مجید اور دین اسلام کے ساتھ ساتھ دیگر مذاہب پر دسترس ہو اور سب سے پہلے ان کے کلام کی اچھے سے جانچ پڑتال ہو۔ میٹنگ میں مزکورہ وائرل ویڈیو سے منسوب نام نہاد شاعر کے خلاف پولیس کی بروقت کاروائی پر اطمنان کا اظہار کرتے ہوئے اس شخص کے خلاف سخت سے سخت سزا دینے کی مانگ کی گئی۔

میٹنگ میں فورم کے نائب صدر پیر ابراہیم سمبلی، سید اسد اللہ صفوی، غلام حسن حسن، عامر ملک، شوقین سونمی اور دیگر ممبران نے شرکت کی۔