سابق کابینہ وزیر اور سینئر اپنی پارٹی لیڈر غلام حسن میر کی ایل جی منوج سنہا سے ملاقات، سیاحت کے اہم مسائل اجاگر
ٹنگمرگ: سابق کابینہ وزیر اور جموں و کشمیر اپنی پارٹی کے سینئر نائب صدر، غلام حسن میر نے جمعرات کو راج بھون سرینگر میں جموں و کشمیر کے لیفٹیننٹ گورنر شری منوج سنہا سے ملاقات کی۔
جاری شدہ پریس بیان کے مطابق، ملاقات میں عوامی مفاد اور ترقیاتی امور پر تفصیلی گفتگو ہوئی، جس میں وادی میں سیاحت کے فروغ پر خصوصی زور دیا گیا۔
میر نے لیفٹیننٹ گورنر سے ذاتی طور پر مداخلت کی اپیل کرتے ہوئے متعدد غیر دریافت شدہ سیاحتی مقامات جیسے گوگلدارہ، بٹہ پتھری، بدرکوٹ اور دودھ پتھری اسنو پوائنٹ کو سیاحوں کے لیے کھولنے پر زور دیا۔ انہوں نے کہا کہ ان مقامات کو عوام کے لیے کھولنے سے نہ صرف سیاحتی آمد میں تنوع آئے گا بلکہ مقامی نوجوانوں کے لیے روزگار کے مواقع بھی پیدا ہوں گے۔
ملاقات کے دوران دونوں رہنماؤں نے جموں و کشمیر کی موجودہ سیاسی اور سیکورٹی صورتحال پر بھی تبادلۂ خیال کیا۔ میر نے امن، استحکام اور ہمہ جہت ترقی کو فروغ دینے کے لیے مسلسل کوششوں کی ضرورت پر زور دیا۔
لیفٹیننٹ گورنر نے میر کی طرف سے اُٹھائے گئے مسائل کو بغور سنا اور انہیں یقین دلایا کہ انتظامیہ سیاحت کو فروغ دینے اور جموں و کشمیر کے عوام کے مسائل کو حل کرنے کے لیے پرعزم ہے۔